।। श्री ।।
।। श्री राम समर्थ ।।
।। जय जय रघुवीर समर्थ ।।
नव्हे चेटकी चाळकु द्रव्यभोंदु ।
नव्हे निंदकू मत्सरू भक्तीमंदू ।।
नव्हे उन्मतू वेसनी संगबाधू ।
जनीं ज्ञानिया तोचि साधू अगाधु ।।१८१।।
नव्हे वाउगी चाहुटी काम पोटी ।
क्रियेवीण वाचाळता तेचि मोठी ।।
मुखे बोलिल्यासारिखे चालताहे ।
मना सद्गुरू तोचि शोधूनि पाहे ।।१८२।।
जनीं भक्ती ज्ञानी विवेकी विरागी ।
कृपाळू मनस्वी क्षमावंत योगी ।।
प्रभु दक्ष व्युत्पन्न चातुर्य जाणे ।
तयाचेनि योगे समाधान बाणे ।।१८३।।
नव्हे तेचि जाले नसे तेचि आले ।
कळों लागले सज्जनाचेनि बोलें ।।
अनिर्वाच्य ते वाच्य वाचे वदावे ।
मना संत आनंत शोधीत जावे ।।१८४।।
लपावे अति आदरे रामरूपी ।
भयातीत निश्चित ये स्वस्वरुपी ।।
कदा तो जनीं पाहताही दिसेना ।
सदा ऐक्य तो भिन्नभावे वसेना ।।१८५।।
सदा सर्वदा राम सन्निध आहे ।
मना सज्जना सत्य शोधूनि पाहे ।।
अखंडित भेटी रघूराजयोगू ।
मना सांडी रे मीपणाचा वियोगु ।।१८६।।
भुते पिंड ब्रह्मांड हे ऐक्य आहे ।
परी सर्वही स्वस्वरुपी न साहे ।।
मना भासले सर्व काही पाहावे ।
परी संग सोडूनि सुखि राहावे ।।१८७।।
देहेभान हे ज्ञानशास्त्रे खुडावे ।
विदेही पणे भक्तिमार्गेचि जावे ।।
विरक्तीबळें निंद्य सर्वे त्यजावे ।
परी संग सोडूनि सुखि राहावे ।।१८८।।
मही निर्मिली देव तो ओळखावा ।
जया पाहता मोक्ष तत्काळ जिवा ।।
तया निर्गुणालागी गुणी पाहावे ।
परी संग सोडूनि सुखि राहावे ।।१८९।।
नव्हे कार्यकर्ता नव्हे सृष्टीभर्ता ।
परेहुन पर्ता न लिंपे विवर्ता ।।
तया निर्विकल्पासी कल्पित जावे ।
परी संग सोडूनि सुखि राहावे ।।१९०।।
।। जय जय रघुवीर समर्थ ।।
🙏🙏🙏🙏🙏🙏🙏
कोणत्याही टिप्पण्या नाहीत:
टिप्पणी पोस्ट करा