।। श्री ।।
।। श्री राम समर्थ ।।
।। जय जय रघुवीर समर्थ ।।
म्हणे दास सायास त्याचे करावे ।
जनीं जाणता पाय त्याचे धरावे ।।
गुरुं अंजनेवीण तें आकळेना ।
जुने ठेवणे मीपणे ते कळेना ।।१४१।।
कळेना कळेना कळेना कळेना ।
ढळे नाढळे संशयोही ढळेना ।।
गळेना गळेना अहंता गळेना ।
बळें आकळेना मिळेना मिळेना ।।१४२।।
अविद्यागुणे मानव उमजेना ।
भ्रमे चुकले हित ते आकळेना ।।
परीक्षेविणे बांधले दृढ नाणें ।
परी सत्य मिथ्या असें कोण जाणें ।।१४३।।
जगी पाहता साच ते काय आहे ।
अती आदरे सत्य शोधुनि पाहे ।।
पुढें पाहता पाहता देव जोडे ।
भ्रम भ्रांती अज्ञान हे सर्व मोडे ।।१४४।।
सदा विषयो चिंतिता जीव झाला ।
अहंभाव अज्ञान जन्मास आला ।।
विवेके सदा स्वस्वरुपी भरावे ।
जिवा उगमी जन्म नाही स्वभावे ।।१४५।।
दिसे लोचनी ते नसे कल्पकोडी ।
अकस्मात आकारले काळ मोडी ।।
पुढें सर्व जाईल काही न राहे ।
मना संत आनंत शोधूनि पाहे ।।१४६।।
फुटेना तुटेना चळेना ढळेना ।
सदा संचले मीपणे ते कळेना ।।
तया एकरूपासी दुजे ना साहे ।
मना संत आनंत शोधूनि पाहे ।।१४७।।
निराकार आकार ब्रम्हादिकांचा ।
जया सांगता शिणली वेदवाचा ।।
विवेके तदाकार होऊनि राहे ।
मना संत आनंत शोधूनि पाहे ।।१४८।।
जगी पाहता चर्मलक्षी न लक्षे ।
जगी पाहता ज्ञानचक्षी निरक्षे ।।
जनीं पाहता पाहणे जात आहे ।
मना संत आनंत शोधूनि पाहे ।।१४९।।
नसे पीत ना श्वेत ना शाम कांही ।
नसे व्यक्त अव्यक्त ना नीळ नाहीं ।।
म्हणे दास विश्वासतां मुक्ती लाहे ।
मना संत आनंत शोधूनि पाहे ।।१५०।।
।। जय जय रघुवीर समर्थ ।।
🙏🙏🙏🙏🙏🙏🙏
कोणत्याही टिप्पण्या नाहीत:
टिप्पणी पोस्ट करा